जम्मो बूता हा चुनाव माँ बोहागे
लइका सियान सबो चुनाव माँ भुलागे
विधानसभा के चुनाव आगे चुनाव आगे
चुनाव आगे कहिके नेता मन हा भागत आगे
कहत हाबे चुनाव आगे चुनाव आगे
लइका सियान सबो चुनाव माँ भुलागे
कोनो भाजपा माँ ता कोनो कांग्रेस माँ
ता कोनो स्वाभिमान मंच माँ भुलागे
कतको झन तो अपन पार्टी ला भुलागे
लइका सियान सबो चुनाव माँ भुलागे
इकर रंग रंग के घोषणा माँ दिन हा बूड़त हे
बबा हा नी मरे हे तब ले बरा हा चूरत हे
इहाँ उहाँ के दौरा में नेता हा सुखागे
लइका सियान सबो चुनाव माँ भुलागे
कोनो मिठाई कोनो दारु ता कोनो पईसा बाटत हे
चुनाव आगे कहिके गली गली कईसे झाँकत हे
चुनाव जीतगे तहन नेता हा जनता ला भुलागे
लइका सियान सबो चुनाव माँ भुलागे
कोनो पिये मा ता कोनो खाये मा भुलागे
जनता हा अपन अधिकार ला भुलागे
हमर देश के खजाना चुनाव मा लुटागे
लइका सियान सबो चुनाव माँ भुलागे
रचनाकार - जितेन्द्र कुमार साहू
कोई टिप्पणी नहीं:
एक टिप्पणी भेजें